बुधवार  06 एप्रिल 2022 चे दैनंदिन राशी भविष्य.

कृष्णमूर्ती पद्धतीने नक्षत्रीय फलादेश देत आहे.

बुधवार 06 एप्रिल 2022 चे दैनंदिन राशी भविष्य. बुधवार चंद्ररास वृषभ दिवसरात्र व चंद्रनक्षत्र रोहिणी 19.38 पर्यंत व नंतर मृगशीर्ष आहे. वरील दोन्ही राशी नक्षत्रांचा विचार करून आजच्या पहाटेच्या वेळेनुसार कृष्णमूर्ती पद्धतीने नक्षत्रीय फलादेश देत आहे.

आज श्री विष्णूचा दोलोत्सव आहे.

मेष :-आज प्रत्येक कामात अतिशय धावपळ होणार आहे. मित्रमंडळींच्या मदतीने न्यायालयातील  रेंगाळलेल्या कामांना मार्गी लावण्याकरीता चर्चा कराल. विद्यार्थ्यांना आपले छंद जोपासण्याची चांगली संधी मिळणार आहे.

वृषभ :–अतिमहत्त्वाच्या कामातील झालेल्या गडबडीमुळे चांगलाच मनस्ताप होणार आहे. कुटुंबात बहीण भावंडांमधील चर्चेला उधाण येईल. घराचे थांबलेले बांधकाम पुन: सुरू करण्याविषयी चर्चा कराल.

मिथुन:–नोकरीतील कामाच्या दगदगीमुळे आजारी पडणार असल्याची भावना निर्माण होईल. विद्यार्थ्यांना आपल्या क्षमतांचा अंदाज घेऊनच पुढील गोष्टी ठरवाव्यात.

कर्क :–घरातील व्यक्तींच्या एकोप्याने नवीन घर घेण्याचे बेत आखले जातील. विद्यार्थी स्वत:च्या प्रयत्नाने अभ्यासातील अवघड भाग समजून घेतील व यश खेचून आणतील.

सिंह :–नोकरीत तुमच्या कर्तृत्वामुळे तुमचा रूबाब वाढेल. कामाचे योग्य नियोजन करून सहकार्यांमधे सुसूत्रता आणाल. नेतृत्व गुण सिद्ध कराल.

कन्या :- लहान बहिणीच्या संसारातील अडचणींसाठी धावून जावे लागेल. घरातील वयस्कर मंडळींसाठी एखाद्या धार्मिक पूजेचे नियोजन कराल. स्वत:हून मदत करून  समाधान मिळवाल.

तूळ :– मैदानावरील खेळांची आवड असल्याने अडचणींचा विचार न करता सहभाग घ्याल. नोकरीत बदलीच्या बातम्या कानावर येथील.

वृश्चिक :– महत्वाच्या कामात विघ्न आल्यामुळे कामे वेळेवर होणार नाहीत. अतिउत्साहामुळेही कामात बिघाड निर्माण होईल.

धनु :–परगावी असलेल्या मुलांच्या काळजीने जीव धास्तावणार आहे. कठीण प्रसंगातून मार्ग काढण्यासाठी बरेच पैसे खर्च करावे लागतील.

मकर :–नोकरी व्यवसायात अचानक प्रगतीचे मार्ग सापडतील. कुटुंबात जवळच्या नातेवाईकांच्या हस्तक्षेपामुळे संघर्ष निर्माण होईल.

कुंभ :–नोकरीत उद्भवलेल्या कठीण प्रसंगावर मित्रांच्या मदतीने मार्ग काढाल. कुटुंबात मंगलकार्याची बोलणी करण्याकरता  नातेवाईकांचे येणे होईल.

मीन :–उत्साहाच्या भरात स्वत:ची मौल्यवान वस्तू दुसर्यांना देऊन टाकाल. तुमच्या मुठभर यशाची बातमी लोकांकडून डोंगराएवढी केली जाईल.

|| शुभं-भवतु ||